Turbeskrivelse Hellefjellet

Tilkomst/parkering: Myklebust. Følg vegen til garden Myklebust om lag midt i Follestaddalen. Vis omsyn til gardsdrifta når du parkerer.

1.21.1 Opp frå Myklebust i Follestaddalen ➋ Utfordrande

Følg tydeleg opning i skogen oppover sida langs Myklebustelva. Komen opp i dalen, følgjer ein kraftlinja opp sida til ein når det lågaste punktet på salen mellom Sandhornet (958 moh.) og Grøthornet (1086 moh.), kalla Seilen. Ta deretter sørover (høgre) opp ryggen til toppen av Grøthornet, og følg den stadig smalare toppryggen (eller hald litt nord for denne) austover til toppen av Hellefjellet. Retur same veg som ein kom opp gjev fin-fin køyring i snilt og flott skiterreng.

1.21.2 Ned via Harpedalen til Kolåsen ➌ Komplekst

Dersom ein vil ha ein liten rundtur, kan ein frå toppen av Grøthornet få flott køyring i moderat skiterreng ned Harpedalen til Kolåsen fremst i Follestaddalen. Denne nord- vende sida held ofte god snø. Ved dette alternativet er det ein føremon om ein har førehandsplassert ein bil i Kolåsen, då det er om lag 3 kilometer langs vegen attende til utgangspunktet på Myklebust.

Finn flere turbeskrivelser for toppturer i Sunnmørsalpene og på Kolåshalvøya her.