Klatrarane Kjetil Revheim (15) og Harald Husum (15) tykkjer det er rått at dei no får ein innandørs klatrevegg å boltra seg i. Klatreklubben hadde tidlegare ein vegg i gymsalen på ungdomsskulen, men då salen vart rusta opp fekk dei ikkje setja veggen opp att.
— Vi plar å trena i byen om vinteren, men no slepp vi å reisa så langt. Dessutan kan vi kanskje byrja å klatra i gymtimane, seier Husum til lokalavisa Bygdanytt. Osterøy Klatreklubb har arbeidd med ideen om å få til ein klatrevegg i Osterøyhallen sidan 2003. Klubbleiar Ole Mikalsen er godt nøgd med at dei no kan setja i gang med arbeidet.
— Dette er ein merkedag for både klatreklubben og alle friluftsinteresserte på Osterøy, seier han.
Den nye klatreveggen skal plasserast i sørenden av Osterøyhallen, på høgre side av porten. Den blir 110 kvadratmeter stor og vil dekkja omtrent halve veggen. Det vil verta plass til om lag 10 klatrarar om gongen i veggen.
Osterøy klatreklubb har sjølv dekt ein tredjedel av kostnadane, medan dei har fått 174.000 kroner frå Osterøy kommune og 174.000, kroner av spelemidlane som vert fordelte av Hordaland fylkeskommune.
— Vi har fått signal om at vi kom til å bli tildelt desse pengane, men har ikkje heilt våga å tru på det. No startar vi monteringa i veke 40, i skulen sin haustferie, seier Mikalsen.
