– Høgfjellsområda i Jotunheimen har framleis betydeleg skredfare, men også her er faren gradvis på veg ned. I Hallingdal og Telemark har det kome litt nysnø siste døgn, denne vil gradvis stabilisere seg, men det kan framleis vere lett å løyse ut skred i den ferske snøen. Det finst også vedvarande svake lag i snødekket, seier vaktleiar i Noregs Vassdrags- og Energidirektorat (NVE), Jostein Aasen.
Redusert skredfare i heile landet
For påskas siste feriedag måndag varslar Varsom.no framleis faregrad 3 - betydeleg skredfare - i Jotunheimen, men ellers 1 eller 2 i heile Noreg.
– Ved utgangen av påska er skredfaren avtakande i det meste av landet. På Nordvestlandet har me eit ganske stabilt snødekke, og skredfaren er på veg ned mot faregrad 1 her. Også i nord er det også mange regionar som byrjar å bli vurdert til faregrad 1, seier Aasen.
Skredproblema i Nord-Norge varierer, men det går mot tryggare forhold i heile den nordlege delen av landet.
– I dei nordlegaste regionane er skredproblema stort sett små, ferske fokksnøflak som er danna etter snøbyger. Både storleiken og utbreiinga av desse flaka er vurdert som liten, men flaka er lette å løyse ut. I Nordland er det også fokksnø som er skredproblem, men denne fokksnøen er eldre og det skal meir til for å løyse ut skred i den, seier Jostein Aasen.
Skredfare i indre austland
Samstundes tyder fleire observasjonar på ein lyt vere oppmerksam i områder som ikkje har fast skredvarsling. Skredvarslinga oppfordrar folk til å sende inn observasjonar sjølv om dei ikkje er frå områder med skredvarsel:
– I det indre austlandet, utanfor varslingsregionane, har det vore observert både drønn i snødekket og skred dei siste dagane. Det tyder på at det finst eit skredproblem med vedvarande svakt lag i snødekket også her. Me oppfordrar alle til å sende inn slike observasjonar sjølv om ein er utanfor faste varslingsregionar. Då kan andre som ferdast i fjellet få din hjelp til til å gjere eigne vurderingar av skredfaren i området, seier vaktleiar Jostein Aasen.
