– Kva er det du gjer på bileta, eigentleg?
– Eg går ei nordrenne opp frå Dyrskar på Haukelifjell – den einaste renna eg veit om som er snofast heile sumaren, eller det er kanskje ei overdriving. Snødekket var noko usamanhengande så halvparten av turen gjekk i ein bekk. Fekk ein spontan idé om å dra på ski og tenkte at Haukelifjell var det snøsikraste i august og fekk med meg ja-person Magnus Tjønn. Om sumaren er den gamle vegen over Haukelitunnelen open slik at ein lett når inn til fleire renner.

– Er det dette Sigurd Løvfall (se portrett i Fri Flyt) kallar type 2-moro?
– Haha, lenge sidan eg har gjort noko så dumt og samtidig morosamt. Eg såg fyrst på det som rein type 1 – har ein tendens til å undervurdere prosjekta mine, men det var ein del type 2 når me klatre opp bekkefalla med hardplast på føtene, men som kjent, type 2 er stas det også, i etterkant.

Annonse

– OK. K2-ski og alpinbinding på bildene. Kva har skjedd?
– Eg rauk på ein smell i gunnerunnet i Rindabotn i april og rifta leddbandet. Tre veker seinare køyrde eg til Turtagrø med krykkjene baki bilen for å halde telemarkkurs saman med Sigurd. Espen Sollien redda meg med eit par alpinstøvlar og så var me i gang, er nok ikkje mange som har hatt telekurs på alpinsetup!

– Kor mange K2-ski skal du skruve opp med telemarkbinding?
– Skal nok berre ha ei ski med telemarkbinding. Akkurat no syns eg det er så feitt korleis spennet i alpinskia kan brukast på ein heilt annan måte enn det eg er vand med. Er flekselærling hjå Karl-Kristian Muggerud, han inspirerar i fleksekunsten og forhindrar leggmusklar i å ryke, eit lite stikk til Espen Arnesen der som også hadde sine veker på krykkjer i vinter, haha. Men djup laussnø i open bjørkeskog er framleis best på telemark, ferdig snakka.

– Farvel telemark. Er nynorsken det neste som fell?
– Ser det slik ut etter at eg har omsett spørsmåla dine til nynorsk?

– Skal du lime K2-logo på dine eldgamle Scarpa T1?
– Blir ikkje lett, ingen ting festar seg lenger på dei, knapt nok spennene.

– Kva høyrer du på i sumar?
– Byrjar dagen med album av Enslaved og Mayhem, så over på Digable Planets og Ivan Ave – får tid til å høyre mykje når eg går aleine med hamar og sag. Gamle Metallica og Motörhead-album er soundtrack når eg kløyver ved i regnvêr.

– Og kva skal du i haust og vinter?
– I haust skal eg nokre veker på reinsdyrjakt, deretter litt tømring her og der. Shout-out om nokon har ein liten tømrarjobb i Sogn til meg! Så fort snøen kjem skal eg kun stå på ski. Er med på eit nytt web-serie prosjekt saman med Sogndalsbanden (Calabacín, Woodbear, Unge Nikkolai og Slowmotion Sam++), og me drar over til Canada så fort forholda blir gode. Kjem til å bli episk, lågmælt tømmerkoie-liv, ispedd djup skikøyring langt inne i dei store skogane.

– Eg høyrer rykte om ein remix av trehopp-videoen. Eksisterar den?
– Tja, eg laga ein, men eg var ikkje så nøgd med sjølve hoppet, men innrunnet, det var kult! Så det må i såfall bli råfilmen frå Virben. Rakk berre to forsøk før me måtte pakke saman, det blir ein del to av det prosjektet ein dag.

– Kven eller kva skal me sjå opp for i vinter?
– Jan Olav Nordskog over ein roadgap i Arabygdi i Vinje, Supervention 2 og webserien frå gjengen i Sogndal viss tittel framleis er uviss.

– Du køyrer mykje frå Telemark til Sogn. Har du eit bra roadtriptips?
– Stopp i Kinsarvik og kjøp med dravle og ei side lokalt pinnekjøtt, så blir dei i andre enden av reisa glade for å sjå deg.

– Kva er den mest minneverdige bilturen du har hatt til eller frå Sogndal?
– Det var ein kveld då eg køyrde kollone over Vikafjellet i den gamle bmw'en. Vindaugsviskarbolten hadde løsna og midt i snøstormen fall viskaren av. Eg hang med armen ut av ruta og viska snø frå fontruta med luva, og prøvde å sjå vegen og føle meg fram medan fronten stadig dulta i fonna eller lastebilen framfor. Solid kaffeskjelv nede i Myrkdalen etterpå.

PS! Til info: Calabacín, Woodbear, Unge Nikkolai og Slowmotion Sam = Karl-Kristian Muggerud, Vebjørn Enersen, Nikolai Nygaard og Trygg Lindkjølen