Laussnømekkaet Sogn Skisenter

Her fins barnetrekk og restaurant med meir. I 2014 vert Modvotrekket bygd. Det aukar fallhøgda til omlag 680 meter. 

Toppen av trekket er eit fint utgangspunkt for mindre bratte turar innover fjellet, Asbjørnsnosi frå sør er den grommaste turen herifrå.

Molden, Sfinxen i Lustrafjorden ligg rett vest, ein kort køyretur tek deg til vanlegaste startpunktet på Krossen.

Mange vil vel likevel seie at det beste med Heggmyrane er villsnøen.

Mykje løypenær laussnøskreiing i hovedbakken, dei lange og flotte nedturane mot Hafslo i sør og Dalsdalen mot nord byr på store og opne snøbakkar.

Det høgste startpunktet i Sogn skisenter vinteren 2013/14 er på 860 moh. Modvotrekket vil starte eit lite stykkje ned og nord frå toppen av eksisterande trekk, og gå til 1001 moh.

Frå toppen opnar det seg nye område til villskikøyring. I nærleiken av toppen av det gamle trekket er det mykje skogfri laussnøkøyring.

Vi har lagt vekt på å omtale linjene i skogen, der det er ope, eller er rydda fram skiterreng.

Under skildrar vi ei nedkøyring som kan karakteriserast som tur, og ellers generell laussnøskreiing.

Hugs at laussnøskreiing i skisenter er eit av dei vanlegaste scenarioa i skredulykker. Skredkurs og skredvit, sendar/mottakar, spade og søkestang høyrer med.

1. Kulturcruising ned til Hafslo

Nydeleg skikøyring med alpekjensle over marker og forbi uteløer tek deg heilt ned til Hafslo sentrum.

Laussnøbuss/taxi vert sett opp nokre helger, eller ein ordnar skyss sjølv. Halde sørover «kufortløypa» frå toppen av det lange trekket, ta av lengst sør der løypa svingar austover og nordover att.

Litt kronglete staking og eventuelt gåing sørover tek deg inn til toppen av bøane over Hafslo. Gamle løemurar dannar fine hopp!

Kjøp deg ei brus på butikken, set deg på benken og lat som du er i Val d’Isere!

• Lengd: 5 minutt gange fra heisen

• Himmelretning: S

• Lengde nedkøyring: 600 høgdemeter

• Brattaste punkt: 25 grader

• Farar: Piggtråd

2. Mykje flott laussnøterreng mellom dei to sørlegaste løypene. Ikkje mykje hamrar her, om nokon.

3. Litt nord for den midterste løypa er det rydda fram smådropp og vakkert terreng. Etter du har gått av den lange heisen tek du «kufortløypa» mot sør og peikar tuppane mot aust etter 150 meter.

4. Frå toppen av gamletrekket etterkvart til høgre inn i glissen skog som snart vert tettare, og av type «gran».

Her er det ein fordel å vere godt kjend eller ha heilhjelm og anna rustning på!

5. Frå gamletrekket ut venstre og ned forbi hola der vassreservoaret til snøkanonene er, vidare i rydda granskog i bratte og ofte populære linjer.

6. Opningane 6 og 7 i skogen er ikkje rydda fram, dette er snøskredrenner! Det er ein fordel for snødekket om her har vore skilauparar her ofte.

Frå gamletrekket går ein 10 min mot, og som regel over Klugsbotn for denne linja. Eventuelt skli sørover frå Modvotrekket.

Så hardt venstre og traverser nordaust inn på hylle. Nedover når det måtte passe alt etter føre og form. Hamrar, puter og dropp kan finnast.

7. Ei meir skredutsett linje enn 6, då ein traverserer skredterreng i mange titals meter med skog under seg, altså det vi kallar ei terrengfelle.

Over ein er skredterreng også, med ei konveks form. Om det kjem skilauparar ned ovanifrå kan desse løysne snøskred på andre. 

8. Gå frå gamletrekket (15 min) eller skli ned frå Modvotrekket til denne nydelege og lite skredutsette ryggen.

I starten susar ein forbi eit og anna furetre, før skogen tetnar litt etter kvart.

Få nokon lokale nede ved heisbua til å peike ut kvar ein tar av sørover for å til slutt komme av ryggen og innatt i trekket.

9. Skli rett i frå nye Modvo-trekket og ned denne store og trygge sida som nok kan bli litt slak i for mykje laussnø.

Sikt mot Sønnesynstølen, etter stølen tek terrenget ein ryggform. Hald ryggen i den opne gata i skogen. Stak attende, det er lett å stake seg vill i langrennsløypene!