Snø og skiføre på Sunnmøre

Stig er ein av forfattarane bak boka Toppturar i Sunnmørsalpane, som kjem i ny og forbetra utgåve i haust. Gode tips til turar som ofte er fine tidleg på sesongen finn du også her.

Snørapport frå Sunnmørsalpane

Bomtur på Saudehornet (1303 moh.)

Dei siste par vekene har vi hatt skikkeleg sunnmørsk skitver, med massiv nedbør og 3-5 grader i låglandet. Dette betyr kvitt gull i høgda, noko som var lett synleg frå Ørsta sentrum, då veret endeleg klarna opp søndag. Derfor tok eg ein fottur oppover mot sentrumsfjellet Saudehornet for å sjekke snøforholda søndag ettermiddag.

Resultatet var nedslåande, då det som på avstand såg ut som eit relativt godt snødekke, på nært hald synte seg å berre vere ei moderat kåpe som knapt dekte den til dels grove ura på fjellet.

Fullklaff i Sætretindane (1365 moh.)

Men, på Sunnmøre kan det vere store lokale skilnader i snømengd. Derfor freista eg måndag ettermiddag i staden lukka i Fladalen på Standaleidet. Ved inngangen til dalen er det ein  anleggsveg som startar på 340 moh., og som alle veit, er vegar flate, utan framstikkande steinar. Dermed kunne eg klappe på skia halvvegs oppe i vegen, dvs. 400 moh.

På veg innover og oppover sjølve Fladalen, auka snømengda monaleg. Komen opp i 1250 moh., målte eg ikkje mindre enn 110 cm snø på flatmark! Men ikkje berre det; det synte seg raskt at det også hadde danna seg ein ikkje ubetydeleg sole, som så hadde fått om lag 15 cm med rein pudder på toppen. Dermed var det berre å spenne opp skorne og kruse nedover dalen i 900 herlege høgdemeter. Rett nok tøtsja eg stein eit par-tre gonger på veg ned, men slik må ein rekne med så pass tidleg i sesongen.

Årets topptursesong er godt i gang med nydelege forhold fleire stader i Noreg – i Lyngsalpene, på Nordmøre og i Sogn har det blitt kjørt masse pudder allereie!

Sjå film: