Ein finn opne, moderat bratte sider, fin skogskøyring i le for vestaveret, men samstundes kan korte, bratte parti oppsøkast for meir spennande skikøyring.
Hyttefolk og skientusiastar rydda skog og veita bekkar hausten 2006 frå vårstølen til fjellstølen (Vigdalstøl), og dette gjorde turen til Buskrednosi og Kattøyra mykje lettare.
Vigdalstølen DNT-hytte er eit flott utgangspunkt for dei turane som vert skildra her, det er ein kort tur inn til hytta som ligg på om lag 770 moh ved foten av Buskrednosi.
Granskogen her vart planta av vigdølen Hans Vigdal, skulelærar, naturmedisinar og fjellklatrar som åleine gjekk ruta Vigdals sva på Store Skagastølstind i 1890.
Komme dit: Ta av mot Vigdalen rett før Haukåsgjøltunnelen, vegen er til tider bratt oppover, så gode vinterdekk er kjekt å ha. Følg vegen til endes og parker på stor, utbrøyta parkeringsplass.
Turane frå Vigdalen går alle frå parkeringsplassen på 550 moh, bomvegen som går vidare vert ikkje brøyta om vinteren. På hausten og på våren kan det vere mogeleg år om anna å køyre til parkeringsplassen på Vårstølen.
Fjell og toppturer i oversiktskart:
5. Buskrednosi
6. Kattøyra
7. Fivlenosi
8. Kollen
Oversiktskart over Jostedalen. Frå Toppturar i Sogn.
Jostedalen
Geografisk strekkjer Jostedalen seg 4 mil frå Gaupne i sør og til Styggevatnet i nord. Lokalt følgjer stadnamnet likevel den gamle kommunegrensa ved Haukåsgjølet.
Leirdøler og vigdøler reknar seg vanlegvis ikkje som jostedøler, og snakkar heller ikkje jostedalsdialekt. Her har vi likevel samla desse sørlege hengjedalføra i kapittelet om Jostedalen.
Etter som ein køyrer framover Jostedalen vert avstanden til nasjonalparkane på både sider mindre og mindre, Jostedalsbreen nasjonalpark i vest og Breheimen i aust.
Bygda er altså omringa av verna natur, relativt høge fjell og store og små brear. Breane fortel oss at det snøar mykje i fjellet lokalt. Nærleiken til den største breen på Europa-kontinentet gjev ein lang vinter.
På Gjerde 200 meter over havet er snønormalen over ein meter i starten av april, og så aukar det på oppover fjella til metervis med snø i høgda.
Svært store snøfall på 30-40 cm er det normalt sett få av, men sjeldan mildver og regn gjer at snøen byggjer seg opp jamnt og trutt utover vinteren.
Det vil og seie og at kvaliteten på snøen er jamn, det går gjerne 3-4 månader mellom skarelaga.
Anleggsvegane frå kraftutbygginga på 80-talet brånar fram litt etter litt utover våren og gjev tilgang til Vanndalen, Geisdalen og Styggevatnet. Dette gjev Jostedalen ein lang skisesong.
Draumen er å ha råd til å brøyte vegane tidlegare på våren, då vil Jostedalen kunne by på meir skiareal i mai/juni enn til dømes Trollstigen. Om vårtrafikken på ski aukar kan det verte ein realitet.
Skiturar kan vere eventyr som er uvisse og spanande. Om ein veit alt på førehand kan ein miste noko på vegen.
Det har vorte gått på ski mange stader i Jostedalen, og spesielt i Vanndalen og Leirdalen er det skilinjer i prinsippet overalt. Les gjerne mellom linjene og stå på ski mellom linjene.
Komme hit: Bygdesenteret Gjerde ligg midt i dalen, omlag 30 minutt køyring nordover frå Gaupne, ein time frå Sogndal og om lag ein time og 20 minutt frå flyplassen i Sogndal, Haukåsen. Køyreturen til Leirdalen er 20 minutt kortare.
Overnatting: Det er to vinteropne overnattingsstader; Jostedal Hotell (jostedalhotel.no) eller på hytter på Jostedal Camping (jostedalcamping.no). Dei ligg begge på Gjerde, rett ved butikken.
Guiding: FimbulJostedal (fimbuljostedal.no) held til i Jostedalen.
Kart: Norge-serien 1:50.000 dekker Jostedalen: Sogndal 10053: Leirdalen, Vigdalen og Sogn skisenter, Jostedalsbreen 10063: Myri, Krundalen, Styggevatnet
