Turen startar med utsikt til den blenkande Sognefjorden og tek deg vidare gjennom eit kontrastfylt og vakkert landskap over fire ulike breplatå; Jostefonni, Grovabreen, Jostedalsbreen og Myklebustbreen.
Ruta er i tillegg skreddarsydd slik at du får med deg fem lange nedkøyringar frå mykje brukte toppturfjell.
Denne turen går gjennom indrefileten av skiterreng i Sunnfjord, og etter tre tøffe etappar opp og ned desse brefalla vil sjølv dei sprekaste kjenne seg ”well done”.
Etappene på Sunnfjordruta
Dag 1: - Gaularfjellet - Gottophesten - Sunnfjordbjørnen - Grovabreen - Sægrov.
Dag 2: Skei – Storaksla – Bjørga – Kvannebakknova – Bings gryte – Hanekammen - Høyset.
Dag 3: Høyset – Haugabreen – Snønipa – Sollibotnen - Veiteberg.
Sesong: Mars – juni. Beste tida å gå turen er frå midten av april til midten av juni
Tid: Tre dagar
Stigning: 6400 høgdemeter
Fall: 6920 høgdemeter
Lengd: 87 km
Utstyr: Breutstyr, skarejern/stegjern
Kart: Norge-serien: Førde, Ålfotbreen og Jostedalsbreen 1:50.000 dekkjer heile ruta
Tips: Det er lurt å lage ein god framdriftsplan på førehand. Start dagsetappane tidleg på morgonen for å unngå bratt og soleksponert terreng seint på dagen.
Dagsetappane er lange, så du bør gå med lett utstyr og vere i god form. Undervegs har du fleire alternativ for å komme deg raskt ned igjen til sivilisasjonen, dersom du må avbryte turen.
Gradering etter terrengklassifisering, eksponerings- og vanskegrad er sett per dagsetappe ut frå den mest krevjande delen av etappen.
Fleire stadar kan du velje alternative ruter for å finne mindre krevjande terreng om forholda skulle gjere det naudsynt.
Oversiktskart over Sunnfjordrute. Frå Toppturar i Sunnfjord
Overnatting: Det er anbefalt å overnatte i Viksdalen for å kunne starte første etappe tidleg på morgonen. I april og mai kan du overnatte på Hov Hyttegrend (hovhyttegrend.no) eller Flatheim (gaularfjellet.no).
Etter turen kan du overnatte i Stardalen Hyttegrend (stardalenhyttegrend.no) eller på Thon Hotel Jølster på Skei (thonhotels.no).
Jølster har fleire andre overnattingsstadar som kan vere aktuelle, sjå Jølster365 (jolster365.no) for meir informasjon
Mat: Lag ein god plan for matrasjonar du må ha med deg for heile turen. Mellom første og andre etappe er du innom Skei, som har matbutikk og bensinstasjon. Sjekk opningstider
Tilgang: Med tilgang på privat skyss plasserer du ein bil på Høyset i Stardalen før du køyrer til turstart på Gaularfjellet.
Transport: Det er ein fordel om du organiserer transport privat.
Du kan t.d. plassere ein bil på Høyset i Stardalen før du køyrer til turstart på Gaularfjellet.
Det går rutebuss frå Førde til Viksdalen, men tilbodet er avgrensa. Det er gode bussforbindingar mellom Førde og Skei.
Du kan òg gjere avtale med lokale taxi-selskap i Førde eller Jølster.
