Stigning: 1100 meter frå Ringdalstøylen.

Utstyr: Hjelm, spade, søkjestong, sendar–mottakar, randonée- eller telemarkski og vinterklede. 

Farar: Ein kan leggje sporet slik at ein held seg under 30 grader det meste av vegen. Hald nok avstand frå den bratte sida av Tverrfjellet og ver merksam på skredterreng i sida opp mot toppen. På toppryggen kan det danne seg store skavlar. Hald derfor tilstrekkeleg avstand her, slik at du ikkje ramlar ned den bratte nordveggen.

Vegval: Følg E39 frå Volda sentrum til du kjem ut av Kvivstunnelen. Ta her av mot Stranda og følg veg 60 til du ser Hellesylt nede til høgre. Ta no opp nokre svingar til Ringdal og vidare på setrevegen heile vegen inn Synnylvsmoldskreddalen til Ringdalstøylen. Frå støylen følgjer du anten Tverrdalen heile vegen nordover mot toppen eller så kan du ta opp på ryggen til venstre og leggje turen innom Lisje-Skruven (1548 moh.) før du går vidare til topps.

Nedkøyring: Det mest vanlege er å følgje same veg ned som opp, noko som altså gir krusing i slakt og fint terreng. Ein kan godt karakterisere dette som ein god, gammaldags klassisk skitur. Trass dette er fjellet relativt sjeldan vitja med ski på beina.