Stigning: 1500 meter frå Urkegjerdet. 1350 meter frå Haukåssætra. 

Utstyr: Hjelm, spade, søkjestong, sendar–mottakar, randonée- eller telemarkski og vinterklede. Ved hard snø vil ein trenge stegjarn og/eller isøks for å klatre frå Nordkopen til toppryggen.

Farar: Skredterreng innover Nordkopen og i sida opp frå kopen til toppryggen. Stor skavl i austsida av den breie toppryggen. Ver ekstra varsam i vårsnøen i ettermiddagssola.

Vegval: Følg veg 655 frå Ørsta sentrum til Sæbø. Ta ferja Sæbø–Lekneset og hald fram om lag 2 km på veg 655 til du kjem til Urke. Ta no venstre inn på grusveg og køyr så langt som du kjem i retning Haukåssætra. Gå inn dalen mot Nordkopen eit lite stykke før du kjem til setra. Frå kopen sikkar du bratt opp mot toppryggen, som du følgjer nordover heile vegen til toppen. Frå toppen får du eit fantastisk utsyn utover Hjørundfjorden mot Ålesund og storhavet.

Nedkøyring: Den slakke toppryggen innbyr til krusekøyring. Men når du skal ned i Nordkopen, må du skjerpe deg, for her blir det monaleg brattare eit stykke, før terrenget legg seg ned-over mot Haukåssætra og Urkegjerdet.