Utstyr: Hjelm, spade, søkjestong, sendar–mottakar, randonée- eller telemarkski og vinterklede. Ved hard snø vil ein trenge stegjarn og/eller isøks for å klatre dei siste høgdemetrane til topps.

Farar: Skredterreng heile vegen til topps, og særleg i toppflanken.

Vegval: Følg E39 frå Ørsta nordover mot Ålesund. Ta ferja Solavågen–Hundeidvika. Ta av venstre like etter ferjeleiet og følg hovudvegen mot Sykkylven/Stranda i om lag 24 km til du kjem til Brunstad. Frå Ålesund tek du ferja Magerholm–Aursneset, før du følgjer veg 60 i om lag 17 km til du kjem til Brunstad. Ta av til høgre frå vegen inn forbi bustadfelt og parker ved kraftverket. Følg så vegen vidare oppover til Vellesætra, der du også finn ei ubetjent turisthytte med 11 sengeplassar. Følg ein liten morenerygg nokre hundre meter innover dalen, før du tek nordvestover og passerer Storhaugen på venstre side. No ventar bratt stigning opp til Kløvheia (1000 moh.) Herifrå ser du  ruta opp til topps. Når du har igjen 20 meter til toppen, følgjer du ei hylle som går mot vest, opp på egga, før du klyv dei siste 10 metrane til topps.

Nedkøyring: Returen gir fin-fin nedkøyring i bratt til moderat terreng, gjerne i morgonsola tidleg på vinteren.